بما إن الناس اللي واقفيـن على عربية الفول ناس بسيطة وميعـرفوش يعني إيه بيزنس و Business Model..
وبما إن عربية الفول بقت شئ أساسي في حياة ناس كتيـر ومشـروع بيجيب ربح ولو بسيط فاحنا سمحنا لنفسنا نقـول عليه بيزنس .. ونحاول ندرس الموضوع من زاوية تانية ونخلي عربية الفـول اللي تدينا دروس..
- الـ Value Proposition / القيمة المضافة لعربية الفول
1- عربية الفول في أي مكان في الشارع، لو انت ماشي في أي حتة ممكن تقف تاكل ساندوتشين في 5 دقايق وتمشي، ودي قيمة مش موجودة في أي حتى تانية ممكن تاكل من عندها حتى لو محل بيبع فول برضو.
2- سعر الساندوتش اللي تقريبا أرخص ساندوتش فول في مصر بيبقى ع العربية.
3- الجودة.. على الرغم من انه رخيص، عربية الفول بتقدملك أحلى ساندوتش فول ممكن تاكله.
- الـ Customer Relationship / العلاقة
الراجل اللي واقف على عربية الفول بيعاملك أحسن معاملة ويقدملك أحسن طلب وبيتوصى كمان ويخليك ترجعله تاني، ودي مش موجودة في محلات الفول التانية.
- الـ Customer Segments / الزباين المستهدفين
عربيـة الفول بتستهدف كل الناس، الصغير والكبير، الغني والفقير، الولد والبنت .. بتستهدف أي شخص ماشي في الشارع ويكون جعان.
الـ Key Activities / المهام الأساسية
يعني الراجل اللي واقف على عربية الفول محتاج يعمل ايه علشان يوصل القيمة المضافة للناس .. وطبعا كلنا عارفين هو بيعمل ايه، عنده الفول جاهز وبيطلعهولك وهو واقف في صورة منتج نهائي في ثواني ( الساندوتش )
الـ Key Resources / المصادر
يعني هو محتاج إيه علشان يعمل المشروع ده.. كل اللي محتاجه عربية فول وقدرة ومصدر دائم يجيب منه الفول والعيش يومياً، والأهم من كل ده يتارجت المكان الصح اللي هيقف فيه.
الـ Channels / قنوات التوزيع
عربية الفول مبتحتاجش قنـوات توزيع لأن القيمة بتاعتها قايمة على الناس اللي معدية في الشارع.
الـ Cost / التكلفة
عربية الفول بتحتاج طبعا تكاليف أولية وتكاليف دايمة، التكاليف الأولية هي سعر عربية الفول نفسها، وسعر القدرة والأدوات التانية اللي بيستخدمها..
أما التكاليف الدايمة فهي الفلوس اللي هيدفعها يومياً في الفول والعيش اللي هيجيبه طازة كل يوم.
الـ Revenue / الأرباح
عـربية الفول ليها مصـدر ربح واحد بس، وهو سعر الساندوتش وده بيتم حسابه عن طريق حساب تكلفة الفول والعيش وتحديد سعر ثابت للساندوتش بحيث يطلع هامش ربح في الآخر.
طبعاً أكيد الموديل ده من أنجح Business Models اللي ممكن تشوفوها .. كل واحد يقولنا اتعلم إيه من بيزنس موديل عربية الفول وحابب يزود إيه
تابعونا علي فيس بوك كرياتوفا
تابعونا علي تويتر كرياتوفا
ليست هناك تعليقات:
إرسال تعليق